Gorozikako plazan hasi eta amaituko dan ibilaldia inguruko auzoetatik pasatuko da eta bere kota gorenena Bizkargi mendiko Santa Kurtze ermitan (565m) izango da.
Ibilbidea hasi eta gitxira herriko harrobitik pasatu, Atxepunten haitzetatik gora egin eta Arburuko mendi gailurra aurkituko dugu. Tarte horretan inguruko pasaiekin gozatzeko aukera izango da. Hortik, aldats behera egingo dugu San Romaneko pistarekin topo egin arte. Bertan, ezkerrerantz Gerekizeko noranzkoa hartuko dugu, lehenengo anoa postuarekin topo egin arte. Jarraian, aldapa dator, ibilbideko punturik altuenera heltzeko, Bizkargira. Santa Kurtze ermita ondoan likidoen anoa postu bat dago. Bertotik, Bizkargiko jaitsierari ekingo deutsagu eta Aldana auzoan “Espinosa ibilbidearekin” elkartuko gara; ibilbide tarte hau bukatzean bigarren anoa postua egongo da. Hortik aurrera ibilbide lasai eta erosoa aurkitu dozue, Gorozikako sarreran azken aldaparekin topo egin arte.
Martxaren bukaeran jai giroan zernahi jan eta edateko aukera egongo da, eta parte-hartzaileentzako opari bana.